माजी सरपंच संजय राजिवले यांच्या गाडीची अज्ञात इसमांकडून तोडफोड
कोलाड,दि.२८(कल्पेश पवार)
रोहा तालुक्यातील वरसगाव ग्रामपंचायतीचे माजी सरपंच संजय राजिवले यांच्या गाडीची अज्ञात इसमांकडून तोडफोड करण्यात आली आहे.या घटनेमुळे परिसरात घबराटीचे वातावरण पसरले आहे.
रविवारी ( ता.२७ ) रोजी संजय राजीवले हे आपल्या मालकीची (नं.एम एच ०६ बीजी ७७७०) ही गाडी आपल्या राहत्या निवासस्थानी नेहमीच्या जागेवर पार्क करून ठेवली होती.त्याच दिवशी मध्यरात्रीच्या सुमारास अंधाराचा फायदा घेत अज्ञातांनी गाडीवर दगडफेक करून गाडीची मोडतोड केली.सदरची दुर्देवी घटना दुसऱ्या दिवशी सकाळी त्यांच्या निदर्शनास आली. या घटनेचे वृत्त परिसरात वाऱ्यासारखे पसरले. चार चाकी गाडीवर झालेल्या दगड फेकीमुळे गाडीचे नुकसान झाले असून या झालेली दगडफेक करण्याचा मागचा नक्की हेतू काय? या घटने मागे कोणाचा हात आहे.? हे मात्र अद्याप समजू शकले नाही. घडलेला प्रकार हा अत्यंत निंदनीय असून या घटनेबद्दल वरसगाव परिसरात संतापाची लाट पसरली असून या घटनेची माहिती संजय राजीवले यांनी कोलाड पोलिसांना देत घटनेची चौकशी करावी अशी मागणी केली आहे…
फोटो कॅप्शन : वरसगाव येथील माजी सरपंच संजय राजीवले यांच्या गाडीवर दगडफेक करून मोडतोड करण्यात आली.(छाया-कल्पेश पवार)